Слава Отцу и Сыну и Святому Духу.

Пети песнь со благодарением и усердием Творцу и Богу даждь ми, и тебе, благому Aнгелу хранителю моему: избавителю мой, изми мя от враг озлобляющих мя.

И ныне и присно и во веки веков. Аминь.

Исцели, Пречистая, моя многонедужныя струпы, яже в души, прожени враги, иже присно борются со мною.

 

Господи, помилуй. (Трижды)

 

Спасе мой Иисусе, блуднаго спасый, Спасе мой Иисусе, приемый блудницу, и мене ныне помилуй, Иисусе многомилостиве, спаси, ущедри, о Иисусе благодетелю, якоже, Благоутробне, Манассию, Иисусе мой, яко Един человеколюбец.

 

От любве душевныя вопию ти, хранителю моея души, всесвятый мой Aнгеле: покрый мя и соблюди от лукаваго ловления всегда, и к жизни настави небесней, вразумляя и просвещая и укрепляя мя.

 

Слава Отцу и Сыну и Святому Духу. И ныне и присно и во веки веков. Аминь.

Богородице безневестная Пречистая, Яже без семени рождши всех Владыку, Того со Aнгелом хранителем моим моли, избавити ми ся всякаго недоумения, и дати умиление и свет души моей и согрешением очищение, Яже едина вскоре заступающи.

 

Песнь 4

Ирмос: Пришел еси от Девы, не ходатай, ни Ангел, но Сам, Господи, воплощся, и спасл еси всего мя человека. Тем зову Ти: слава силе Твоей, Господи.

 

Иисусе Сладчайший, спаси мя

Исцели, Иисусе мой, души моея язвы, Иисусе мой, молюся, и руки мя исхити, Иисусе мой благоутробне, душетленнаго велиара, и спаси.

Иисусе Сладчайший, спаси мя

Согреших, Иисусе мой Сладчайший, благоутробне; Иисусе мой, спаси мя, прибегающаго к покрову Твоему, Иисусе долготерпеливе, и Царствия Твоего мя сподоби.

Иисусе Сладчайший, спаси мя

Никтоже согреши, Иисусе мой, якоже согреших аз, окаянный, но припадаю моляся, Иисусе мой, спаси мя и жизни, Иисусе мой, наследие ми даруй.

Пресвятая Богородице, спаси мя

Всепетая, Иисуса рождшая Господа, Того моли избавити муки вся, поющия Тя, и Богородицу воистинну именующия.

Пресвятая Богородице, спаси мя

Во гласех пений, Дево, Тебе вопием, Всепетая: радуйся, тучная горо и усыренная Духом; радуйся свещниче, и стамно Манну носящая, услаждающая всех благочестивых чувства.

Пресвятая Богородице, спаси мя

Очистилище миру, радуйся, Пречистая Владычице; радуйся Лествице, от земли всех возвысившая благодатию; радуйся мосте, воистинну преводяй всех от смерти к животу поющих Тя.

Пресвятая Богородице, спаси мя

Небес превышшая, радуйся, земли основание в Твоих ложеснах, Пречистая, нетрудно носившая; радуйся червленице, багряницу Божественную омочившая от кровей Твоих Цареви силам.

Пресвятая Богородице, спаси мя

Законодавца рождшая истиннаго, радуйся Владычице, беззакония всех туне очищающаго; недоведомая глубино, высото неизреченная, Браконеискусная, Еюже мы обожихомся.

Пресвятая Богородице, спаси мя

Тя, исплетшую мирови нерукоплетенный венец, песнословим, радуйся, Тебе Дево зовуще: хранилище всех и ограждение, и утверждение, и священное прибежище.

Святый Aнгеле Божий, хранителю мой, моли Бога о мне.

Моли Человеколюбца Бога ты, хранителю мой, и не остави мене, но присно в мире житие мое соблюди и подаждь ми спасение необоримое.

Святый Aнгеле Божий, хранителю мой, моли Бога о мне.

Яко заступника и хранителя животу моему прием тя от Бога, Aнгеле, молю тя, святый, от всяких мя бед свободи.

Слава Отцу и Сыну и Святому Духу.

Мою скверность твоею святынею очисти, хранителю мой, и от части шуия да отлучен буду молитвами твоими и причастник славы явлюся.

И ныне и присно и во веки веков. Аминь.

Недоумение предлежит ми от обышедших мя зол, Пречистая, но избави мя от них скоро: к Тебе бо единей прибегох.

 

Песнь 5

Ирмос: Просвещение во тме лежащих, спасение отчаянных, Христе Спасе мой, к Тебе утренюю, Царюмира, просвети мя сиянием Твоим: иного бо разве Тебе бога не знаю.

 

Иисусе Сладчайший, спаси мя

Ты просвещение, Иисусе мой, ума моего, Ты спасение отчаянныя души моея, Спасе, Ты, Иисусе мой, муки избави и геенны мя, зовуща: спаси, Иисусе мой Христе, мя окаяннаго.

Иисусе Сладчайший, спаси мя

Всеконечно, Иисусе мой, ко страсти безчестия низвержен ныне зову: Ты, Иисусе мой, помощи ми руку низпослав, исторгни зовуща: спаси, Иисусе мой Христе, мя окаяннаго.

Иисусе Сладчайший, спаси мя

Осквернен ум, Иисусе мой, обнося, взываю Ти: очисти мя от скверны прегрешений и избави мя во глубины злобы от неведения низпоползшагося, Спасе Иисусе мой, и спаси мя, молюся.