Молитвенное правило Иверской обители, заимствованное из Гефсиманского скита

Боже, очисти мя, грешную, и помилуй мя. (Поклон.)

Создавый мя, Господи, помилуй мя. (Поклон.)

Без числа согреших, Господи, прости мя. (Поклон.)

Боже, милостив буди мне, грешной. (Поклон.)

Боже, прости беззакония моя и согрешения. (Поклон.)

Пресвятая Владычице моя Богородице, помилуй мя и спаси мя, и помози ми ныне в жизни сей, и во исходе души моея, и в будущем веце. (Поклон.)

Непобедимая, непостижимая, Божественная сило Честнаго и Животворящаго Креста Господня, не Остави мя, грешную, уповающую на Тя. (Поклон.)

Вся небесныя силы, святии ангели и архангели, херувими и серафими, помилуйте мя и помолитеся о мне, грешной, ко Господу Богу и помогите ми ныне в жизни сей, и во исходе души моея, и в будущем веце. (Поклон.)

Ангеле Христов, хранителю мой святый, помилуй мя и помолися о мне, грешной, ко Господу Богу и помози ми ныне в жизни сей, и во исходе души моея, и в будущем веце. (Поклон.)

Святый великий Иоанне, Пророче, Предтече и Крестителю Господень, помилуй мя и помолися о мне, грешной, ко Господу Богу и помози ми ныне в жизни сей, и во исходе моея, и в будущем веце. (Поклон.)

Святии велиции трие святителие: Василие Великий, Григорие Богослове и Иоанне Златоусте, помилуйте мя и помолитеся о мне, грешной, ко Господу Богу и помозите ми ныне в жизни сей, и во исходе души моея, и в будущем веце. (Поклон.)

Святителю отче Николае, помилуй мя и помолися о мне, грешной, ко Господу Богу и помози ми ныне в жизни сей, и во исходе души моея, и в будущем веце. (Поклон.)

Преподобнии отцы, Иоанне, списателю «Лествицы», Антоние, Феодосие и вси Киево-Печерские чудотворцы, помилуйте мя и помолитеся о мне, грешной, ко Господу Богу и помозите ми ныне в жизни сей, и во исходе души моея, и в будущем веце. (Поклон.)

Святии апостоле, первомучениче архидиаконе Стефане, великомучениче и целителю Пантелеимоне. преподобнии отцы Сергие, Никоне, Дионисие и вси Радонежские чудотворцы и святый праведный Филарете, помилуйте мя и помолитеся о мне, грешной, ко Господу Богу и помозите ми ныне в жизни сей, и во исходе души моея, и в будущем веце. (Поклон.)

Преподобнии отцы Зосимо и Савватие, Соловецкие чудотворцы, помилуйте мя и помолитеся о мне, грешной, ко Господу Богу и помозите ми ныне в жизни сей, и во исходе души моея, и в будущем веце. (Поклон.)

Святии великомученицы Варваро, Екатерино, преподобномученице Февроние и мученице Фомаидо, святый мучениче Иоанне Воине, помилуйте мя и помолитеся о мне, грешной, ко Господу Богу и помозите ми ныне в жизни сей, и во исходе души моея, и в будущем веце. (Поклон.)

Святии славнии и всехвальнии апостоли, пророцы и мученицы, святителие, преподобнии, праведнии и вси святии, помилуйте мя и помолитеся о мне, грешной, ко Господу Богу и помозите ми ныне в жизни сей, и во исходе души моея, и в будущем веце. (Поклон.)

Господи, или словом, или делом, или помышлением согреших во всей жизни моей, помилуй мя и прости мя милости Твоея ради. (Поклон.)

Молитва 1-я

Боже, очисти мя, грешную, яко николиже сотворих благое пред Тобою, но избави мя от лукаваго, и да будет во мне воля Твоя: да неосужденно отверзу уста моя недостойная и восхвалю имя Твое святое, Отца и Сына и Святаго Духа, ныне и присно и во веки веков. Аминь. (Поклон.)

Молитва 2-я

Господи Иисусе Христе, Боже мой, посещаяй тварь Свою, Тебе явлены страсти моя, и немощь естества моего, и крепость супостата моего; Ты Сам, Владыко, покрый мя от злобы его, занеже сила его крепка и естество мое страстно и сила немощна; Ты убо, Благий, ведый немощь мою, Иже носяй неудобство бессилия моего, сохрани мя от помысла смущенна и потопа страстей и достойна мя сотвори сея службы святыя, да никако во страстех моих растлю сладость ея и обрящуся бесстудна пред Тобою и дерзостна, но милостию Твоею помилуй мя, яко благословен еси вовеки. Аминь. (Поклон.)

Молитва 3-я

Владыко Господи Иисусе Христе, Боже мой, Ты помощник ми буди в руку Твоею аз, да не оставиши мене согрешати, яко прельщена есмь, да не оставиши мене последовати хотению моему лукавому, да не оставиши меня во гресех моих; ущедри Твое создание, не отвержи мене от лица Твоего грех ради моих, яко к Тебе прибегох: исцели душу мою, яко согреших Ти, пред Тобою суть вси оскорбляющии мя и ищущии душу мою изъяти ю, и несть мне прибежища инаго, токмо к Тебе, Господи. Господи, спаси мя милости Твоея ради, яко Ты еси, Господи, сильный во всяческих, яко Твое есть Царство и сила и слава, со Отцем и со Святым Духом, ныне и присно и во веки веков. Аминь. (Поклон.)

Молитва 4-я

Господи, аще хощу, аще не хощу, спаси мя, понеже бо аз, яко кал любовещный, греховную скверну желаю, но Ты, яко благ и всесилен, можеши мя возбранити; аще бо праведнаго помилуеши, ничтоже велие, и аще чистаго спасеши, ничтоже дивно, достойни бо суть милости Твоея; но на мне паче, Владыко, окаянней, грешней и скверней, удиви Милость Твою, покажи благоутробие Твое: Тебе бо оставлена есмь нищая, обнищавши всеми благими делы. Господи, спаси мя милости Твоея ради, яко благословен еси вовеки. Аминь. (Поклон.)

Молитва 5-я

Владыко, помилуй мя благости Твоея ради и не остави мене заблудити от Твоея воли, и не отвержи убогия молитвы моея от Твоего лица, но услыши, Господи, глас молитвы моея, егда молюся Тебе во дни и в нощи, и приими, яко кадило избранно, и не возбрани грехов моих ради благодати Твоея, но спаси мя имене Твоего Святаго ради. Твое бо есть еже миловати и спасати ны, и Тебе славу возсылаем, Отцу и Сыну и Святому Духу, ныне и присно и во веки веков. Аминь. (Поклон.)