И ныне, Богородичен: Образ носящи древле рождества Твоего, Дево Мати, пещь разжженная юноши невредимы сохрани, такожде и огнь Божественный не попали утробы Твоея, Чистая.

Песнь 9

Ирмос: Исаие, ликуй: Дева име во чреве и роди Сына Еммануила, Бога же и человека, Восток имя Ему; Егоже величающе, Деву ублажаем.

Сродницы твои, преподобная мати Евфросиние, оплакавше твою честную кончину, омывше и опрятавше честныя мощи твоя, погребоша тя со святолепным пением во обители преподобнаго Феодосия, возвращшеся же во град Полотск, возвестиша о блаженнем успении твоем князем и людем и девам, собранным тобою во обители твоей. Тии же, со умилением слезы источающе, воздаша хвалу и благодарение Трисиянному Богу и начаша праздновати память блаженнаго успения твоего.

Видяще Российстии иноцы честныя обители Пресвятыя Богородицы град Иерусалим обстоим от поганых агарян, изнесоша честныя мощи твоя во пресветлый град Киев и водвориша я во обиталищи преподобных Антония и Феодосия Печерских чудотворцев, тамо Промыслом Божиим неврежденно и хранимы бяху до лет наших, во оправдание веры нашея, юже со Евфросиниею Полотская земля прият от князя Владимира.

Слава: Бог в Троице славимый, в Егоже руце сердце царево, внуши помазаннику Своему, благочестивейшему государю императору Николаю Александровичу, благий совет: призрети на моление и вопль Полотския страны, да водворит на место земных подвигов честныя мощи твоя, яже мы сретающе, псаломски вопием: да даст Господь державному правителю нашему по сердцу его и весь совет его исполнит, да укрепит Белорусскую землю в Православии, и да запнет злохитрым латином в лукавстве их, и молитвами преподобныя да возвратит отторженныя коварством и насилием.

И ныне, Богородичен: Светом Твоего милосердия озари мя, во тьме неразумия лежащаго, Едина Светодавца рождшая, Избавителя и Бога, святыя венчавшаго.

Светилен, глас 8:

Равноангельно поживши на земли, равноангельну обрела еси светлость, тех бо боговиднаго сияния причастница была еси, с нимиже и радуешися всегда; предстоящи Престолу Святыя Троицы, присно молися о нас, верою и любовию совершающих празднество пренесения честных мощей твоих.

Слава, и ныне, Богородичен:

Щедроты Твоя, Боже, на люди Твоя низпосли, молитвами Пречистыя Твоея Матере и всех святых, и, предстательством преподобныя Твоея Евфросинии, даруй нам велию милость.

На хвалитех стихиры, глас 8:

Приидите, вернии, хвалами сошедшеся, ныне составим торжество в честнем празднице чуднаго пренесения мощей преподобныя Евфросинии и, духовно празднующе, к ней возопиим: моли Христа Бога православному воинству нашему победы на безбожныя супостаты даровати, людем же крепкое противостояние иноверным подати, тебе бо ко Владыце теплу за ны молитвенницу и помощницу противу еретиков стяжахом, подающую православным утешение и велию милость.

Небеснаго Царя и Владыки Христа невеста была еси, преподобная Евфросиние, чистоту бо соблюла еси, без неяже не узрит Бога никтоже. Того ради и воздаяние по достоянию прияла еси: честное бо тело твое, во гробе лежащее, цело и нетленно соблюдеся, душа же к небесным ликостоянием прейде. Темже Христу Жениху молися присно о всех, чтущих тя любовию и празднующих пренесение многоцелебных мощей твоих, низпослати мир и велию милость.

Подвигом добрым подвизалася еси, течение и веру соблюла еси, преблаженная мати Евфросиние, прочее же соблюдеся тебе венец правды, имже венча тя истинный Мздовоздаятель Христос. Того моли, преблаженная, спастися обители твоей и всем сыновом Белорусския земли, пришествие твое во град Полотск светло торжествующим.

Слава, глас 6:

Приидите, вси благовернии людие, сошедшеся празднуим пренесение мощей преподобныя Евфросинии: сия бо измлада покори плоть духу и по Господним стопам изволи ходити, на земли праведное житие показа, Ангелы удиви, демоны же устраши и человеки просвети. К ней убо мы ныне рцем: радуйся, мудрая управительнице во спасение; радуйся, две обители, яко свещи, возжегшая; радуйся, светом жития твоего просветившая страну Полотскую; радуйся, бывшая во украшение пещер Киевских; радуйся, молением граждан полотских во удел твой возвратившаяся; радуйся, Евфросиние предивная, земный ангеле, ныне на небесех предстоящи у Престола всех Царя, Христа Спаса Жениха твоего, к Нему молися за Полотскую страну и за вся люди православныя, верою и любовию празднующия твое честное пренесение, во еже спастися им.

И ныне, Богородичен, глас тойже: