Василий Кинешемский (Епископ) — Канон

Василий Кинешемский (Епископ) — Канон

Из службы: Текст бденной службы святителю и исповеднику Василию, составленной (судя по краегранесию канона) в Макариево-Решемском монастыре, воспроизводится по машинописи, полученной из Свято-Введенского женского монастыря г. Иваново.

Канон, глас 2, егоже краестрочие разумно чтется.

Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Святителю отче наш Василие, моли Бога о нас!

Радостию соберитеся мучениколюбцы вси, в памяти святителя Василия, новаго исповедника, торжествуем светло, врага поправшаго, веру соблюдшаго и ко Христу многи приведшаго.

Святителю отче наш Василие, моли Бога о нас!

Евангельским словесем измладенства навык и благодатию Божиею покрываемь, семя жизни нетленныя в души твоей возрастил еси, последи же сеятель добрый на ниве Христове быв, Вышняго благим устроением.

Слава Отцу и Сыну, и Святому Духу!

Шествие твое ко Иерусалиму горнему от младенства предуведено бысть, яко славное и добропобедное, ты же воли Господни повинуяся, тщанием всемерным благословение Сего утвердил еси.

Ныне и присно, и во веки веков. Аминь

Едина в женах благословенная, моли, Богородице Дево, Егоже родила еси от чистых кровей Твоих спасти благочестно поющия Тя.

Песнь 3

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Святителю отче наш Василие, моли Бога о нас!

Милость богатую на тебе Господь показа, егда внят молитве твоей от потопления воднаго спасе тя, ты же, отче, обет исполняя, от мирскаго погружения душу изъяти потщался еси.

Слава Отцу и Сыну, и Святому Духу!

Слова Божия проповедника неустанна почитаем тя, отче, и сказателя Писаний изрядна, яко люди притекающия в вере наставляеши и ко скорбем находящим за имя Христово преславно уготовляеши.

Ныне и присно, и во веки веков. Аминь

Кую Ти похвалу достойную от нечистых устен принесу, о Владычице, точию, якоже осужденник предстоя пред Тобою вопию умиленно: милостива буди ми и спаси мя, Едина Благословенная.

Господи, помилуй! (трижды)

Седален, глас 4:

Веры правыя утверждение и смирения образ, дарований духовных сокровище и словес Божественных цевницу немолчно восхвалим ныне Василия, Кинешемскую похалу, к немуже притекающе вопием умиленною душею: исправление даруй нам, малодушным, и от пропасти погибели возстави унывающия ны, да стопам твоим последующе терпеливно, улучим грехов оставление.

Слава Отцу и Сыну, и Святому Духу! Ныне и присно, и во веки веков. Аминь

В напасти многоплетенныя впад, погубих талант, вверенный мне от Господа, сего ради молю Тя, Пречистая, не попусти конечне погибнути верою и любовию чтущим Тя.

Песнь 4

Ирмос: Услы́шах сла́вное смотре́ние Твое́, Христе́ Бо́же, я́ко роди́лся еси́ от Де́вы, да от ле́сти изба́виши зову́щия: сла́ва си́ле Твое́й, Го́споди.

Святителю отче наш Василие, моли Бога о нас!

Иерейства саном почтився и епископскую харизму прияв, на служение Церкви гонимей приходиши, отче, яко добрый пастырь, оградити овчарню Христову от волков лютых.

Святителю отче наш Василие, моли Бога о нас!

Монашескаго подвига образ явил еси, отче Василие, в келлии тесней всенощно моляся, днем же во храме Дары Священныя Господеви принося и люди твоя наставляя, яко пастырь изрядный.

Слава Отцу и Сыну, и Святому Духу!

Богоборцы лукавии запяти тя помышляху, якоже саддукее древле со иродианы Христа искушающе, твое же утверждено слово пребысть, козни злоначальника до конца низлагающее.

Ныне и присно, и во веки веков. Аминь

Твоему еже о нас промышлению како не дивимся, Владычице, гнев бо праведно на ны движимый утоляеши, темже и от смерти напрасныя покрый нас и даруй нам прежде конца покаяние.

Господи, помилуй! (трижды)

Слава Отцу и Сыну, и Святому Духу. Ныне и присно, и во веки веков. Аминь

Кондак, глас 3:

Мужество твое, святителю Христов Василие, восхваляем, / и чистоту веры превозносим, / и дару словес твоих удивляемся, / яко от небес приял еси Божественную благодать / наставляти и защищати стадо Христово.

Икос

Мудрование плотское отринув, все упование твое в небесных заключив, под чуждое ярмо не преклонился еси, темже в мире лукавом сем душу целу соблюл еси, двоедушныя же посрамил еси. Ныне молим тя, отче Василие, пастырем нашим ревность святую по Бозе испроси, во еже наставляти и защищати стадо Христово.

Песнь 7

Ирмос: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Святителю отче наш Василие, моли Бога о нас!

Егда добродетельми иноческими преславно украсился еси, егда стадо твое ко страданию за веру предуготовал еси, тогда повелением Зиждителевым сам к Голгофе твоей преславно восходиши, победным шествием верныя назидая, поющия: препетый отцев Господь и Бог благословен еси.

Святителю отче наш Василие, моли Бога о нас!

Широких путей уклонився, врагом Христовым не поклонился еси, ниже радоватися тем глаголал еси, радость бо и утешение на Небесех имеяй, скорби, изгнания и заточения подъял еси, вопия: препетый отцев Господи и Боже, благословен еси.

Слава Отцу и Сыну, и Святому Духу!

Евангельскому словеси последуя, до конца себе отверглся еси, крест Господень на рамо взем, сего ради и разумение Писания истинное приял еси от Владыки, талант тебе вверившаго и за делание верное паки приложившаго.

Молитва

О, предобрый предстателю за погибающия во гресех и междоусобных бранех люди Российския земли, крепкий исповедниче Христов святителю отче Василие! Ты бо доблественне подвизался еси в жизни временней, Христа дерзновенно исповедал еси, и многия за Него муки претерпел еси, веру Православную соблюл еси даже до смерти. Умоли Господа Бога, всея твари Содетеля, да подаст нам образ покаяния, да избавит нас от обольщения близ грядущего богоборца, и да сохранит нас от коварной сети его и от всех козней его в сокровенной пустыне Своего спасения. Ей, отче честный! Не посрами ны, притекающия ко твоей помощи, сотвори ны достойны прославляти на небесех со всеми святыми Отца, и Сына, и Святаго Духа, ныне и присно и во веки веков. Аминь.

Василий Кинешемский (Епископ) — Канон

Из службы: Текст бденной службы святителю и исповеднику Василию, составленной (судя по краегранесию канона) в Макариево-Решемском монастыре, воспроизводится по машинописи, полученной из Свято-Введенского женского монастыря г. Иваново.