Чюдо 16-е о друзей жене слепой.

Жена некая того ж града Луху с посада Феврония именем одержима бе очною болезнию. И в том недузе страдаше//(л. 41) 15 лет. Слыша бо бе о чюдесех святаго, что творит слепым прозрение, и повеле вести себе во обитель преподобнаго. И привезена бысть ближними своими во обитель преподобнаго, и молебная о ней сотворше, и священною водою покропивше от гроба святаго, и тако прозре молитвами святаго.

Чюдо 18 о разслабленнем.

Человек некий Селивестр именем Иванов ис Коровиньские деревни бе разслаблен всем телом, и в том недузе много время страдавше, и повеле ся вести во обитель преподобнаго. И молебная о нем//(л. 41 об.) сотворше, и ко гробу святаго приложивше, и укрепистася руце его и нозе, и бысть здрав молитвами преподобнаго.

Чюдо 19 о девице в лето 7077-го.

Девица некая именем Евгения Григорьева дщи ис Филисофских весей одержима бысть очною болезнию, яко не видети ей ни единем оком. И в том недузе страдавше 10 лет, и привезоша ю в девятую пятницу во обитель преподобнаго, и молебная о ней совершив, и приживше ко гробу преподобнаго.//(л. 42) И в том часе прозре очима своима, и бысть здрава молитвами святаго, и отиде в дом свой, радуяся и славя Бога и угодьника его преподобнаго Тихона.

Чюдо 20-е о сухоруком того же лета октября в среду.

Человек некий именем Емелиан Андреев из веси Клековсие, ослабе бо у него рука правая, и не владяше ни единым перстом руки тоя, и прииде во обитель преподобнаго. И молебная о нем совершивше, и руку свою кладяше на гроб преподобнаго, овогда хваташеся// (л. 42 об.) за гроб преподобнаго и плачася, исцеления прося. И молебная о нем совершивше, и тако исцеление получив, и утвердився рука его, яко ж и другая молитвами святаго.

Чюдо 21 о отроке.

Отрок некий, рекомый Третьяк, Карпов сын, бысть язва на шии его, и от тое язвы главу его привлече крамола. И привезоша его во обитель преподобнаго, и молебная о нем совершивше, и священною водою покропивше, и тако вмале исцеление получив, и отиде в дом свой, радуяся, здрав//(л. 43) молитвами святаго.

Чюдо 22 о девице слепой в лета 7077 (1569) июня в 9 день.

Девица некая именем Наталия Михайлова дщи ис Пяленьския веси з Горлова одержима бяше очною болезнию, и бысть того 6 месяцев. Привезоша ю во обитель преподобнаго за седмь дней до памяти преподобнаго, и молебная о ней совершивше, и приложив ея ко гробу святаго, и святою водою покропивше, и тако прозре молитвами святаго.

Чюдо 23 о девице.//(л. 43 об.)

Того же лета в навечерие пред памятию святаго привезли девицу именем Вассу Весильеву дщерь Нефедова села Филисова веси Лядинина: одержима бысть очною болезнию до полугодичнаго времени. Молебная о ней совершивше, и ко гробу святаго приложивше, и тако прозрение получив молитвами святаго.

Чюдо 24 о жене слепой.

Некая жена именем Марья из веси, нарицаемыя Порзны, одержима бысть очною болезнию. И в том недузе страдаше 5 лет.//(л. 44) Привезоша ю во обитель преподобнаго, и молебная о ней совершив, и ко гробу святаго приложивше, и священною водою покропивше, и тако молитвами святаго прозре.

Чюдо 25 о девице слепой.

Девица некая именем Марья от Троицы Верх Устья Федорова дщи одержима бысть очною болезнию от Светлаго Воскресения Великия Пасхи до июля месяца, до преподобнаго памяти. И привезоша ю во обитель преподобнаго, и молебная о ней совершивше, и ко гробу святаго приложившеся, тако прозре//(л. 44 об.) молитвами святаго.

Чюдо 26 о жене.

Жена некая Феодора именем Нечаева жена Никитина сноха Солоденова одержима бе очною болезнию и в том недузе страдаше 5 лет. И приведоша ея во обитель преподобнаго, и молебная о ней совершив, и ко гробу святаго приложивше, и тако прозре молитвами святаго.

Чюдо 27 о слепом.

Человек некий Матфей именем Мартинов сын с Конышева одержим бе очною болезнию, и в том недузе страдаше недель пять.// (л. 45) В навечерие святаго памяти привезоша его во обитель, и приложив к гробу преподобнаго, и тако очима исцеление получив молитвами святаго.

Чюдо 28 о друзем слепом.

Ин человек именем Илья Фомин сын Некрасова из Благовещенского заселья одержим бе очною болезнию и в том недузе страдавше три лета. И привезоша его во обитель на память преподобнаго, и молебная о ней совершивше, и ко гробу преподобнаго приложиша, и в самую заутреню прозрев,// (л. 45 об.) и отиде в дом свой здрав, радуяся и славя Бога и угодника его преподобнаго Тихона.

Чюдо 29 о беснующемся.

Человек некий Козма именем Козмин сын Маркова ис Хрилевы слободы одержим бысть нечистым духом и в том недузе страдаше 7 лет. И привезоша его во обитель, и молебная о нем совершив, и ко гробу святаго приложив. И тако начат кротчае быть, и помале прииде в чювство, и нача пометати себе на гроб преподобнаго, плачуще// горце, вопиюще со слезами из глубины сердца, и благодарение велие воздая святому. И оттоле нача велию веру имети ко святому, и отиде в дом свой здрав и радуяся, похваляюще святаго.