Кiэпхъ цiыкiу мышхуейр къы3эригъэд3ыхар

Еуэри, жеIэ. КIэпхъыжь цIыкIу мэжэлIати, къипкIыхьым-къилъыхьурэ, Мышхуей щIагъым къыщIэхутащ. Дэплъейри, мышхумпIэ къомыр хъуарэ тIыгъуэжауэ щилъагъум, ехъуапсэщ, и гурыIупсыр къажэри, жыгым елъэIуащ:

- Уэ Мышхуейуэрэ Мышхуей, уи щхьэкIэм зиущэхуурэ докIуей, абы нэскIэ сыдумыгъэкIуейуэ зыгъэсыси, мышхумпIэ тIэкIу къысхупыгъэлъэлъ: шхын щхьэкIэ солIэ.

Жыгеижьыр къеплъыхри, кIэпхъыжь цIыкIу щилъагъум, хъымпIap къищIакъым:

- Уэ цIыкIужьейм щхьэкIэ сэ иныжьей дауэ зызгъэсысын! - жиIэри.

- Сэ сыцIыкIужьейми зы псэ ирикъу сIутщ: кхъыIэ, зыгъэсыс!

Мышхуеижьыр ауи къыхуеплъыхакъым.

- УщIегъуэжынщ, тхьэмыщкIэ: Чэцэжь къэсшэнщи, уезгъэ­гъунщ! - жи КIэпхъыжь цIыкIу.

- Чэцэжь жыпIэми, зы ажэкъэ: си къудамэ къесшэхрэ и пхэм сыхущIэуэмэ, Iуейуэ щIэпхъуэжынщ!

Хъункъэ-тIэ жеIэри, КIэпхъыжь цIыкIу мэгубжь аби, къопкIэ­къолъэри Чэцэжь къолъэIу:

- Уэ чэцэжьурэ Чэцэжь, бжэнми мэлми я гъуазэ, Мышхуей зигъэсысу мышхумпIэ къысхупигъэлъэлъыркъым, накIуи, схуегъу!

Чэцэжь гупсысэщ-гупсысэри идакъым:

- Мышхуей и фэ къурэжьыр сыту сщIын, сэ хъун кIыp и щхъуантIэм сыхэтщ! - жиIэри.

- УщIегъуэжынщ, тхьэмыщкIэ: Щхъуэжь къэсшэнщи, уезгъэш­хыжынщ!

- Щхъуэжь жыпIэми, зы хьэ закъуэкъэ: си тхьэкIумитIыр жанщ, си лъакъуиплIыр жэрщ - зэ сыщIэIэмэ, сыIэщIэкIынщи, тIэу сыщIэIэмэ, сынэсыжынщ!

Хъункъэ-тIэ жеIэри, КIэпхъыжь цIыкIу мэгубжь аби, къопкIэ­къолъэри Щхъуэжьым къолъэIу:

- Уэ щхъуэжьурэ Щхъуэжь, мы мэзыр уогъэгулэзри мо жылэр уогъэгузавэ, Мышхуей зигъэсысу мышхумпIэ къысхупигъэлъэлъыркъым, Чэцэжь накIуэу Мышхуей схуегъуркъым, нажи, Чэцэжьыр схуэшх!

Щхъуэжь Мэгупсысэ, мэгупсысэри идэркъым:

- Ажэгъуэмэр къыкIэрихыу Чэцэжь уэдыкъуар сыту сщIын, мэлыбгъэ пшэрым лъакъуащхьэкIэ сыхэтщ!

- УщIегъуэжынщ, тхьэмыщкIэ, Хьэзешэ Плъыжь къэсшэнщи, укъезгъэукIынщ!

- Хьэзешэ Плъыжь жыпIэми, зы фочкъэ: си тхьэкIумитIыр гъэкIащ, си лъакъуиплIыр гъэсащ - зэ силъмэ, сыIэщIэкIащи, тIэу силъмэ, сыкIуэдыжащ!

Хъункъэ-тIэ жиIэри КIэпхъыжь цIыкIу къапкIэщ-къалъэри Хьэзешэ Плъыжь къелъэIуащ:

- Уэ Хьэзешэурэ Хьэзешэ Плъыжь, зытеплъар зыIэщIэмыкI, IэщIэкIами хуемыплъэкIыж, Мышхуей зигъэсысу мышхумпIэ къыс­хупигъэлъэлъыркъым, Чэцэжь накIуэу Мышхуей схуигъуркъым, Щхъуэжь нажэу Чэцэжь схуишхыркъым, неуи, Щхъуэжь къысхуэ­укI!

Хьэзешэ Плъыжь мэгупсысэ, мэгупсысэри и щхьэр къыхуегъэкIэ­рахъуэ:

- Зил яшхыну зэрамыпэсыр сыту сщIын: Шэчэр ауз бланэ ехъуахэр дэхуэжыркъым.

- УщIегъуэжынщ, тхьэмыщкIэ: ПэцIыцI нэсшэнщи, уи фочыпс зэпезгъэшхыкIынщ!

- ПэцIыцI жыпIэми, дзыгъуэжь цIыкIукъэ: си фочыр лъагэу фIэздзэнщи, ди джэдуужьри къэзутIыпщынкъэ.

Хъункъэ-тIэ жеIэри КIэпхъыжь цIыкIу къопкIэ-къолъэри ПэцIыцIым къолъэIу:

- Уэ пэцIыцIурэ ПэцIыцI, дзыгъуэми япщ, пщыIэми и тет, Мышхуей зигъэсысу мышхумпIэ къысхупигъэлъэлъыркъым, Чэцэжь накIуэу Мышхуей схуигъуркъым, Щхъуэжь нажэу Чэцэжь схуиш­хыркъым, Хьэзешэ Плъыжь неуэу Щхъуэжь къысхуиукIыркъым: ныкIэщIэпщхьи, и фочыпс схузэпышхыкI!

ПэцIыцI мэгупсысэ, мэгупсысэри идэркъым:

- ЩIыдагъэ егъэфэжауэ фочыпс бамэр сыIуy сщIын: кхъуей плъыжьыр сужэгъумэ, кхъуей цIынэр си щIэщыгъуэщ!

- УщIегъуэжынщ, тхьэмыщкIэ: Нэгей и къуэ Лъапщагъуэм уезгъэубыдынщ!

- Нэгей и къуэ Лъапщагъуэ жьэгум дэгъухьыжари зы джэ­дуужькъэ: сэ си пэр жыжьэрыпамэщ, и мэр къызэрысщIихьэу си гъуэм сипщхьэжынщ!

Хъункъэ-тIэ жеIэри КIэпхъыжь цIыкIу къопкIэ-къолъэри Нэгей и къуэ Лъапщагъуэ йолъэIу:

- Нэгей и къуэ Лъапщагъуэу жьэгу гъуанэр зи тыншыпIэ, Мышхуей зигъэсысу мышхумпIэ къысхупигъэлъэлъыркъым, Чэцэжь накIуэу Мышхуей схуигъуркъым, Щхъуэжь нажэу Чэцэжь схуиш­хыркъым, Хьэзешэ плъыжь неуэу Щхъуэжь къысхуиукIыркъым, ПэцIьщI ныкIэщIэпщхьэу Хьэзешэ Плъыжь и фочыпс схузэпишхы­кIыркъым: нещи, ПэцIыцI къысхуэубыд!

Нэгей и къуэ Лъапщагъуэ дыгъэм зригъэууэ дэлъти, къэтэджри зиукъуэдийщ, и IэдиитIым зытригъащIэри, «Ухъ!»- щыжиIэм, ПэцIыцI къызэплъэкIщ аби, джэдум иущIа жьэм щыIуплъэм, и псэр IукIауэ Хьэзешэ Плъыжь кIэщIолъадэ, Хьэзешэ Плъыжь къыхощты­кIри и фочыр Щхъуэжь трегъапсэ, Щхъуэжь и щIыбыр мэтхытхри Чэцэжь ныхуолъ, Чэцэжь зимыщIэжу малъэри Мышхуей игъуу мэув, Мышхуей и щIыфэр узу щыхуежьэкIэ и къудамэхэмкIэ къеухыурэ мышхумпIэу пытыр къызыпегъэлъэлъыж.

КIэпхъ цIыкIу зигъэнщIыхукIэ машхэ, мышхумпIэ къомыр зэхуехьэсри и ныкъуэр щIымахуэ гъэтIылъын ещI, къэнам тхьэлъэIу­шхуэ хещIыкIыж, къыдэхуар гъунэгъухэм яхуегуэшыж.

Абы лъандэрэ КIэпхъ цIыкIy псори къыфIэлIыкI хъуащ.